Ministria e Jashtme e Ukrainës tha se u dërgoi shënime përfaqësuesve polakë dhe të Bashkimit Evropian në Ukrainë të premten mbi kufizimin e importeve të grurit ukrainas në vendet e BE-së, duke e quajtur situatën “të papranueshme”.

Deklarata vjen pasi disa vende evropiane, duke përfshirë Poloninë dhe Hungarinë, ndaluan importet e grurit dhe produkteve të tjera ushqimore nga Ukraina pas një rritjeje të mallrave të lira.

“Kufizime të tilla, pavarësisht nga arsyet, nuk përputhen me Marrëveshjen e Asociimit BE-Ukrainë dhe me parimet dhe normat e Tregut të Vetëm të BE-së”, tha ministria në një deklaratë të shtunën, shkruan CNN.

“Ekzistojnë të gjitha bazat ligjore për rifillimin e menjëhershëm të eksporteve të mallrave bujqësore të Ukrainës në Poloni, Rumani, Hungari, Sllovaki dhe Bullgari, si dhe për vazhdimin e eksporteve të papenguara drejt vendeve të tjera anëtare të BE-së dhe, në përgjithësi, tranzitin e papenguar të të gjitha produktet ukrainase drejt vendeve të tjera brenda dhe jashtë BE-së”, thuhet në deklaratë.

Komisioni Evropian e dënoi masën, duke thënë se nuk i takon anëtarëve individualë të vendosin politikën tregtare.

Në deklaratën e saj të shtunën, ministria e jashtme e Ukrainës u bëri thirrje partnerëve të saj të gjejnë një “zgjidhje të ekuilibruar”.

“Kjo është mënyra e vetme për të kundërshtuar me sukses luftën agresive në shkallë të plotë të Rusisë kundër Ukrainës dhe për të forcuar tregun e vetëm të BE-së, në të cilin Ukraina do të bëhet anëtare”, thuhet në deklaratë.